जापान, २७ कात्तिक — सैतामा प्रिफेक्चरको फुकाया शहरस्थित “भेजी मील” (Veggie Meal) नामक कारखानामा कागजात नभएका भारतीय नागरिकहरूलाई काममा लगाएको आरोपमा कम्पनीका अध्यक्ष माकोटो इशी (४८) र मानव संसाधन प्रबन्धक चौधरी हमिद हुसेन (४७) पक्राउ परेका छन्।
प्रहरीका अनुसार, उक्त कम्पनीले “काटिएको तरकारी” र अन्य खाद्य उत्पादनहरू बनाउने क्रममा तीन जना कागजातविहीन भारतीय पुरुषहरूलाई अवैधरूपमा रोजगार दिएको आशंका गरिएको हो।
अध्यक्ष इशीले आरोप अस्वीकार गर्दै आफूलाई “त्यस विषयमा कुनै जानकारी नभएको” दाबी गरेका छन्। तर मानव संसाधन प्रमुख चौधरीले भने आरोप स्वीकार गर्दै प्रहरीलाई बताएका छन्, “मलाई थाहा थियो कि यो गलत थियो, तर मैले उनीहरूलाई कार्य अनुमति बिना काममा राखेको थिएँ।”
टोकियो महानगरीय प्रहरीले गत अक्टोबरमा कम्पनीको परिसरमा छापा मारेको थियो। सो क्रममा कार्यरत १८६ जना विदेशी कामदारमध्ये नौ जना कागजातविहीन भेटिएका थिए। ती सबैलाई अध्यागमन अधिकारीहरूलाई बुझाइएको प्रहरीले जनाएको छ।
अहिले प्रहरीले कम्पनीले कागजात नभएका विदेशीहरूलाई रोजगार दिने संभावित सुनियोजित कार्यशैली बारे थप अनुसन्धान अघि बढाइरहेको छ।
