रसुवाको भोटेकोशी नदीमा बुधबार आएको विनाशकारी बाढीपछि मृतकको संख्या भयावह रूपमा बढेको छ। नेपाल प्रहरीको बिहीबार बिहान ५ बजेसम्मको विवरणअनुसार विभिन्न जिल्लाबाट १६२ जनाको शव फेला परेको छ।
शवहरू रसुवामा मात्रै भेटिएका होइनन्। शक्तिशाली बाढीले मानिसलाई त्रिशूली र नारायणी नदी हुँदै धेरै तलसम्म बगाएको देखिएको छ।
प्राप्त विवरणअनुसार:
- रसुवा – २
- नुवाकोट – १२
- धादिङ – २७
- चितवन – ६४
- गोरखा – २०
- तनहुँ – ९
- नवलपरासी पूर्व – २६
- नवलपरासी पश्चिम – २
गरी कुल १६२ शव फेला परेका छन्।
धेरै शवको पहिचान अझै बाँकी छ। सयौँ मानिस अझै सम्पर्कविहीन रहेको रिपोर्ट भइरहेकाले मानवीय क्षतिको अन्तिम संख्या अझै बढ्न सक्ने आशंका छ। अन्तर्राष्ट्रिय समाचार संस्थाहरूले पनि सयौँ मानिस बेपत्ता रहेको र उद्धारकर्ताले प्रभावित क्षेत्रमा खोजी जारी राखेको जनाएका छन्।
४१ घाइतेको उपचार, २८ प्रहरी अझै सम्पर्कविहीन
बाढीबाट घाइते भएका ४१ जनाको काठमाडौं र त्रिशूलीका विभिन्न अस्पतालमा उपचार भइरहेको छ। खोजी तथा उद्धारमा ३,३१८ प्रहरी परिचालन गरिएको छ भने विभिन्न प्रहरी इकाइका २८ प्रहरी कर्मचारी अझै सम्पर्कविहीन रहेको बिहानको विवरणमा उल्लेख छ।
अहिले उद्धार टोलीको प्राथमिकता जीवित व्यक्तिको खोजी, शवको पहिचान, सम्पर्कविहीन मानिसको विवरण संकलन र बाढीबाट पूर्ण रूपमा विच्छेद भएका बस्तीमा पुग्नु रहेको छ।
